Баатр Делгә Эрднин нертә мөрән лауреат Эрнҗәнә Константин 1912
җилд олн күүкдтә түрү бүлд үүдҗ һарад, эрт экәсн холҗад, бичкнәсн авн хотын теҗәләр заргдад, нег байнас нег байнд орад, борхшҗ ирәд, Советин йосна нилчәр секгдсн сурһулин сарул герт ирҗ төвкнҗ, харңһуһин ханяс гетлҗ, сарулын хаалһд орла. Элстин ШКМ төгскснә хөөн Эрнҗәнә Константинә өмн Саратов балһсна университетин сарул үүдн секгдлә. Һурвн җилд сурсна хөөннь Хальмг таңһчур дуудулад, барин халхар көдлх даалһвр өгсмн.Үүдәлтин хаалһ.Тиигҗ, партин даалһврар Эрнҗәнә Константин түрүни хальмг бичәчнрин зергләнд орсмн. «Улан баһчуд» газетд 1930 җилин март сард түрүн шүлгнь барлгдсмн.
1931 җилд « Дууч шар хөөч» гидг түүкән бичсмн. Эн – намтр түүк. Ачта бичәч түрүн бичсн түүкән соляд, дүрмүдин тууҗ шинрүләд, «Һалан хадһл» гидг роман бичҗ 1965 җилд дуусла.
«Теегин очн» (1935), «Мөңк байр» (1959),«Эвин түрүн хавр» (1961), «Торһа» (1966), «Мини йөрәл» (1969), «Андһар» (1973), «Җирһлин җивр» (1981), «Аңһучин көвүн» (1974), «Тер чилгр өдр» (1977) - иим олн хураңһус умшачнртан бичәч белгллә.
Бичкнәсн авн малын ард йовад, олна ду дуулад, эврән ду һарһад йовдгтан бичәч кесг дууна автор болҗ ик кезәнә хүврлә. Тегәд чигн Эрнҗәнә Константиниг «Дууч шар хөөч» гиһәд чигн нерәднә.
1982 жилд барас һарсн «Цецн булг» гидг дегтрт түүрвәч умшачнриг кезәнәк хальмг улин авъясмудла таньлдулна. Эрнҗәнә Константин олн әмтнә дуд, йөрәлмүд, домгуд, үлгүрмүд, шогмуд, шавашмуд, яс кемәлһ, магталмуд эн дегтртән орулҗ. Эн дегтр өврмҗтә соньн болн цецн тоотар байн болсндан хурдар орс келнд орчулгдла, кесг давтгдҗ барлгдҗ һарла.
1965-гч җилд Эрнҗәнә Константин Советск Союзин Герой Эрдни Деликовин нертә мөрәһәр ачлгдла.1972-гч җилд Хальмг Таңһчин улсин шүлгч гисн күндтә цол зүүсмн.1991-гч җилд эн сәәһән хәәсмн.
