Хонинов Михаил Ванькаевич) 1919 җилин нег шинд Баһ Дөрвд
нутга Цаһан Нур хотнд угатя күүнә өрк-бүлд төрсмн.1937 җилд Әәдрхн балһснд Хальмгин эрдмин техникум төгскәд, Элстин хальмг драмтеатрт артист болҗ көдлсмн.
Үүдәлтин хаалһ.«Улан хальмг» газетин халхсар, 1935 җиләс экләд, Хоньна Михаилин шүлгүд барлгдсмн. Түрүн шүлгнь- тер цагин күндтә күч-көлсч адучнрт нерәдгдҗ (шүлгин нернь - «Адуч»). «Теегт үнн ирв» гидг нааднь «Улан баһчуд» газетд барлгдсн деерән театрин сцен деер дәәнә өмн тәвгдлә.
Дәәнә цаг.1941-1945 җилмүдин Төрскән харслһна Аһу ик дәәнлә теегин зөрмг үрн Хоньна Михаил ах-дү болгч Белоруссин һазрт нерән туурулсн партизан болсмн. Тер цагин тускар «Миша Черный гиснь бив», «Смоленск һазр, чи эс меднч» гидг дегтрмүд алдршсн хальмг партизана зөрмг хаалһинь үзүлнә.
Партизана ротын командир йовад, Белоруссин Березина һол деер немш фашистнриг олар хораҗ, эврә советск әмтән харсҗ авчасндан Улан Тугин орденәр ачлгдсмн. Хальмг теегт үүдсн, Белорусь нутгт зөргнь тахшсн Хоньна Михаил, хойр келн улсин үрн болҗ эңкрлгднә. Тегәд чигн « Белорусь-эк минь!» гиҗ әрүн седкләсн һарһҗ бичлә.
Хоньна Михаилин үүдәврмүд тооһарн олн, сурһмҗарн чинртә, келәрн хурц, байн. « Ээлтә улс» ( хураңһу), тер дотр « Шуурһн» гидг келвр ( хальмг малчнрин кесг үйин дамшлт), « Ухлястин көвәд»- олн тооһас зәрминь нерәдхлә- тер. Болв, хамгин товчта күцәврәснь « Тах» (« Подкова») гидг шүлгүдин хураңһу 1977 җилд Москва хотл балһснд барлгдсинь нерәдҗ болхмн.
Аһу ик Төрскни дәәнә ветеран, дәәнә күчр болн дүмбр өргмҗтә цагин чилшго олн тодлвран сергәҗ, кесг шин үүдәвр бичҗ, олн умшачд белглх бәәсмн, зуг Михаил Ванькаевич Хонинов нәрн билгиннь хурц деерән, ик зураһан дуту күцәһәд, 1981 җилд өңгрв.
